Vestborg vgs - den kristne internatskulen i alpebygda Stranda.

 
Studiespesialisering
Idrettsfag
Påbygging
Internatskule
Fritidstilbod
    Pepparkakehus-konkurranse
    08-Dec-2018


    Laurdag var det pepparkakehus-konkurranse i matsalen. Gjengen som var med delte seg i fire ulike grupper, og dei sette i gong med kvar sine prosjekt.

    Nedanfor kan ein sjå bilete frå både prosessen og det ferdige resultatet. Vinnargruppa hadde laga ein modell av kyrkja på Stranda. Designarar var Ane, Ida, Jenny, Magnhild og Maria B.








     

    Undervisningsglimt
    07-Dec-2018


    Det er det jamne og gode arbeidet som gjev resultat – sånn er det på dei fleste områda i livet. Samstundes kan det å oppleve læring frå ulike perspektiv hjelpe til i det jamne og gode arbeidet.

    I haust har til dømes sosialkunnskap-klassen hatt besøk av Jan Ove Harsjøen medan dei hadde om funksjonshemming. Harsjøen vart lam då han vart utsett for ei ulukke då han var 17 år. Han er no 52 år, og han fortalde om korleis han har takla utfordringane sine i livet etter ulukka. Ein viktig bodskap han hadde til elevane var: «I staden for å fokusere på det eg ikkje kan gjere, så fokuserer eg på det eg kan gjere.»


    Den same gjengen var i november i Volda og besøkte Volda EMA – asylmottak for einslege mindreårige. Der fekk ein lære meir om norsk asylpolitikk, men det som kanskje sette sterkast spor var å få meir innsikt i kor utruleg vanskeleg livet kan vere – og kor mange tøffe opplevingar som ligg bak ein asylsøknad. 



    Sosiologi-klassen har nyleg hatt TV-debatt – utan TV. Temaet var reaksjonar på straffemetodar. Elevane vart delte inn i grupper og kvar gruppe hadde ein talsperson som skulle vere med i debatten.Saman skulle kvar gruppe finne sider som var viktig å setje lys på. Dei ulike debattantane representerte dei politiske partia SV, FrP og KrF. I tillegg var debatten representert av ein psykolog, ein innsett i eit norsk fengsel og ein fengselsbetjent. Det var eit artig prosjekt, mykje på grunn av at det gneistra av debattantane. 



    Dei elevane som har geografi har vore på ekskursjon til Norges vassdrags- og energidirektorat si avdeling på Stranda. Der fekk elevane høyre geolog Einar Anda fortelje om både overvakinga og utviklinga rundt skredfaren ved Mannen i Romsdalen, samt Åkernesremna i Storfjorden. Elevane fekk også kunnskap om norsk skredhistorie og om kva for måleinstrument som vert nytta. Kanskje sov elevane ekstra godt natta etterpå? I alle fall er ikkje Vestborg i fare dersom Åkerneset-skredet skulle gå. Årsaka er at bølgja vil gå langs land ned i Stranda sentrum, og ikkje opp mot Vestborg.

     

     

    Peru-kveld
    29-Nov-2018


    Misjonsprosjektleiarane Hanna Myklebust og Kristoffer Engås har vore i Peru. I førre veke arrangerte dei Peru-kveld. Der fekk Hanna og Kristoffer både fortelje om eigne opplevingar og meir om dei ulike prosjekta russen støttar.


    Like etter møtet fekk vestborg.no veksla nokre ord med dei. 

     

    - Sjølv om eg gledde meg til turen, vart opphaldet i Peru betre enn forventa. Vi veldig god informasjon om prosjekta våre, og vi fekk betre kontakt med peruanarane enn eg hadde trudd, seier Hanna. 

    Kristoffer hadde langt på veg den same oppfatninga. 

    - Det var ein veldig bra tur. Vi fekk sett på prosjekta våre på nært hald, og vi fekk vere saman med dei lokale. Dessutan fekk vi vere litt turistar. Mellom anna var vi på Titcacasjøen, fortel han. 

    PS! Nedanfor finn ein meir informasjon om dei ulike prosjekta til russ-19. Informasjonen er henta frå http://vestborgmisjon.no/, russen si misjonsprosjekt-heimeside.


    KVA VI VIL GJERE FOR PERU
     

    Evangelisering

    I Peru hjelp NLM kyrkjene med å effektivisere arbeidet i ulike menigheiter, slik at dei kan nå ut til enda fleire på kortere tid. Pastorar og kyrkjemedlemmer deltar med husbesøk og evangelisering, i tillegg til at kirkene driv ein misjonsradio. Dette ynskjer vi, saman med NLM å støtte.

     

    Utdanning

    NLM driv ein skule i Arequipa kor dei tilbyr treårig teologisk utdanning, i tillegg til at dei rundt om i landet har bibelskular, barneskular og nokre barnehagar. I Peru har det vore ein veldig klar nedgang i antal bibelskulestudentar, og NLM jobbar med at fleire skal få bibelundervisning.

     

    Samfunnsutvikling

    NLM arbeider med å minske vold i nære relasjonar, seksuelle overgrep, rusmisbruk og kriminalitet i Peru. Ein gong i året har folk i Peru moglegheita til å delta på ein familiekonferanse om ekteskap, barneoppdragelse og utdanning.

     

    Barne og ungdomsarbeid

    NLM ynskjer å utruste barn og unge til eit kristent liv gjennom forkynnelse og undervisning frå dei er små. Dei arbeider også for å minske avstanden mellom foreldre og born, når det kjem til verdiar og tru.

     

    Julemesse-glede
    26-Nov-2018


    På laurdag var det julemesse på tunet. I følgje Svein Lars Ringstad på kontoret kom det inn heile 140 000 kroner sjølve dagen. I tillegg kom det inn omkring 30 000 kroner i loddsal. Det førebelse talet er altså at det har kome inn kroner 170 000 i samband med messa!

    Rektor Håkon Hovda er strålande nøgd.


    -Eg er imponert over innsatsen som Vestborg-laget har lagt ned i samband med julemessa. Her har det vore stor bruk av innsats og tid! Og så var det så kjekt å sjå alle som kom for å støtte opp om skulen. Eg blir audmjuk over kva så mange gjer for både elevane og skulen.


    -Kva legg du i uttrykket audmjuk?


    -Eg opplever som rektor at eg får ta del i noko som er større enn meg sjølv – noko som gjer så mykje i livet til så mange menneske!


    -Kva synest du om summen som vart samla inn?


    -170 000 kroner er ein imponerande sum! For ein givarvilje og givarglede!

    Foto: VG3-elev Østen Olai Ommedal.



     

    «Å vere avhengig» - seminar ved Simon Morris
    21-Nov-2018


    Ungdomsleiar ved Vestborg, Simon Morris, har hatt seminar om det å vere avhengig. Seminaret vart halden fyrst for foreldra på haustfest-dagen. Sist veke haldt han seminaret for elevane.

    I løpet av den 90 minuttar lange økta peika han mellom anna på kva ein kan verte avhengig av, og han kom med råd i lys av Bibelen korleis handtere utfordringa det kan vere med å vere avhengig.

    VG3-elev Sigrid Kristin Thokle var veldig nøgd med seminaret.

    - Det var veldig bra. Simon er generelt inspirerande å høyre på. Han peika på kor lett det er å bli avhengig av ting, samt kor normalisert det har blitt. Mellom anna snakka han om ulike rusmiddel, men også mindre openberre ting som teknologi – noko som det er lett å rømme inn i. Elles fortalde han om seg sjølv; om traume frå eige liv som gjorde at han byrja å bruke rusmiddel, og at han hadde eit dårleg sjølvbilete. Det stabile grunnlaget fekk han fyrst då han møtte Jesus. Då fekk han aksept og grunnleggjande tryggleik. Noko av det eg sit att med etter seminaret, er at det er viktig med stabilitet i livet. Det gjer at ein ikkje så lett utset seg for dumme ting som til dømes rusmiddel, seier Sigrid.

     

    Julemesse på laurdag
    19-Nov-2018

     

    Laurdag 24. november vert det julemesse i gymsalen på Vestborg. Måndag vart 53 kransekakene sett opp, og vestborg.no fekk høyre at Vestborg-laget sin leiar, Bjørg Sve, takka foreiningsmedlemene for jobben dei hadde gjort. 

    - De har gjort ein kjempeinnsats og ein stor laginnsats. Her ligg det mange arbeidstimar bak, sa Bjørg.

    Vestborg-laget er ei kvinneforeining som har haldt koken i 40 år! Det er ikring 10 medlemer som er med i foreininga, og laget sitt føremål er å støtte Vestborg både i bøn og økonomisk. Medan dei har møter, førebur dei seg med å lage ting som vert seld på messa. 

    På biletet ser de den flotte gjengen som for Vestborg gir jernet heile året, men ekstra mykje no i november!


    PROGRAM FOR DAGEN

    Kl. 10.30 Messa opnar

    Kl. 11.30 Samling – sang av Mixkoret

    Kl. 13.30 Sal av rømmegraut m/spekemat (slutt kl. 14.30)

    Kl. 14.30 Allsangmøte med smak av jul

    Kl. 16.30 Avslutningsmøte – hovudtrekning

    Andakt ved Jon Ove Holen

    Sang av Allsangkoret


    Vi tilbyr for sal:
    Smurte lefser - kransekaker - småkaker - flatbrød

    gjærbakst – gåveartiklar - handarbeid

    ÅRESAL - KAFETERIA - TOMBOLA

    Vi har betalingsterminal.

     

    Benjamin Nærø
    05-Oct-2017

     

    Benjamin er ein av 33 elevar i årets VG1-klasse og har vore elev ved Vestborg i 1 ½ månad. Det er ikkje sjeldan å høyre frå VG1-elevar at dei opplever fyrste tida som å vere på leir. Då Benjamin fekk spørsmål om han opplevde at han var på leir, svara han:

    - Nei, eg er ikkje på leir. Eg er heime.

     

    Han kjem i frå Nærøy i Herøy kommune på søre Sunnmøre, og han fortel at han lenge har visst at han skulle gå på Vestborg.

    - Foreldra mine møtte kvarandre då dei var elevar på Vestborg. Difor har eg visst heilt sidan eg var tre år gamal at eg skulle gå her.
     

    Dei fyrste vekene har vore gode.

     - Det har vore heilt supert. Eg har blitt kjent med 32 kjekke klassekameratar og er ein del av eit veldig godt miljø. Sidan vi bur på skulen og derfor ser kvarandre ofte, så utviklar vi eit sterkare fellesskap enn på skular der elevane dreg heim til sitt etter skuletid. Ja, eg opplever at vi her på Vestborg lever i eit eige lite land – Vestborgania, seier han.

     

    Benjamin held fram:

    - Eg diggar skulen. Her får vi god undervisning, vi får servert god mat til faste tidspunkt fire gonger dagleg og vi har kort veg til skulen. Eg slepp å stresse med å ta buss om morgonen. Dessutan får eg nyttig erfaring med å klare meg sjølv. Eg vaskar klede og rom, og eg har ansvar for å kome meg opp på eiga hand om morgonen. Å gå på Vestborg er som ein heim. Her er det tryggleik. Personalet er som mødrer og fedrar, og venene våre er som sysken, skildrar Benjamin.
     

     

    Ida S. Skarshaug
    09-Jun-2017


    – Å gå på Vestborg er den beste avgjersla eg har tatt nokon gong!

     

    Ida begynte på Vestborg fordi bestevenninna ville gå her. Dei hadde høyrt at skulen hadde godt miljø, og i tillegg var det eit pluss at det var internat på skulen.

     

     

    – Eigentleg ville eg gå dramalinja på Fagerlia vgs i Ålesund, men der kom eg ikkje inn. Etter to og ei halv veke på Vestborg, fekk eg kontrabeskjed frå Fagerlia. Men då hadde eg funne ut at eg treivst så godt og passa så godt inn på Vestborg, at eg ville halde fram som Vestborg-elev. Det er eit val eg ikkje angrar litt på ein gong! Det er den beste avgjersla eg har gjort nokon gong! seier romsdalsjenta.

     

    KRISTEN

    Då Ida vaks opp, visste ho ikkje at det fantes kristne ungdomsmiljø.

    – Pappa las i Bibelen til meg då eg var lita, men ingen i mitt ungdomsmiljø var kristne, fortel ho.

    På Vestborg har Ida blitt kristen og mykje falle på plass i livet hennar.

    – Eg skjønar ikkje kva eg har halde på med heile livet, for det å vere kristen gjev så mykje meining!

    – Korleis?

    – I tenåra så skal ein finne ut kven ein er, kva ein står for og kva ein skal gjere med livet. No når eg har blitt kristen, har eg funne ut at det er eit liv etter døden, og at vi lever for å kome til noko så reint som himmelen. Og sjølv om vi lever syndefullt, så skal vi faktisk få kome dit. Det synest eg er fantastisk!

    – Korleis opplever du det å leve som kristen?

    – Det eg opplever veldig stort er at vi kristne kan be for kvarandre. Ja, det er så godt å kjenne at ein har folk i ryggen som støttar ein. Dessutan er samhaldet med andre kristne så godt å oppleve. Uansett kva ein gjer så tenkjer ikkje folk stygge ting om deg. Dei har ikkje negativt fokus i kvardagen. I tillegg så gjer det noko med meg å få bønesvar. Eg har til dømes vore plaga med ein dårleg fot, men den har blitt heila etter å blitt bede for.

    FANTASTISKE FOLK

    Vidare fortel Ida om oldemora si på 85 år.

    – Ho er kristen. Tidlegare har eg ikkje forstått ho så godt, men det gjer eg no. I det siste har eg opplevd at det har blitt eit band mellom oss.

    Ida har også gjort seg nokre tankar om Vestborg som skule.

    – Sidan vi bur på skulen har vi alt tilgjengeleg. Vi kan arbeid med skulearbeid i klasseromma etter skuletid, vi har lærarar som kan hjelpe med skulearbeid når dei har tilsyn og vi har eit triveleg bibliotek. Skulen er liten, og det gjer at fagvalet er lite, men samstundes gjer det at vi blir betre kjende med lærarane våre enn på større skular.

    – Korleis vil du samanfatte ditt fyrste år på Vestborg?

    – Eg har blitt ein anna person i løpet av dette skuleåret. Mellom anna så har eg funne meg sjølv, og eg har snudd tenkemåten min og blitt meir positiv. Dessutan har eg blitt kjend med masse FANTASTISKE folk. Her har eg mange førebilete eg ser opp til, også i veneflokken. Ja, eg har fått vener for livet. Her har eg fått vere meg sjølv og lært meir om korleis ein skal vere saman med andre. No i mai var eg på langweekend-tur til Gdansk. Der hadde eg det heilt fantastisk. Men eg sakna Vestborg!


     

     

     

    Susann Bjørnerem
    10-Dec-2016

     

    – Elevane er inkluderande med kvarandre, seier VG3-elev Susann Bjørnerem

    – Det er veldig bra å vere elev på Vestborg, seier ho.

    Susann har vakse opp i sentrum av Molde, men kom til Vestborg i august 2015 – som ny i 2. klasse.

    – Her er veldig bra folk, seier Susann.

    – Kva meiner du med «bra»?

    – Elevane på Vestborg er hyggjelege og inkluderande med kvarandre. Her finn vi på artige ting i lag, og vi kan snakke med kvarandre om alt. Det gjer at vi kan stole på kvarandre, og vi får venskap for livet, skildrar ho.

    Molde-jenta fortel at ho valde Vestborg og Stranda fordi ho ville prøve noko nytt.

    – Dessutan er eg glad i naturen og i sport. Her på Stranda ligg tilhøva til rette for å dyrke interessa eg har for fysisk aktivitet.

    VESTBORG SINE STYRKAR

    Ho fann seg fort til rette i Vestborg-miljøet.

    – Eg kjende ingen i klassen min før eg byrja, men folk var så opne her at det gjekk veldig bra å bli fort kjend med dei nye klassekameratane mine.

    – Kva ser du på som Vestborg sine styrkar?

    – Det er eit veldig bra miljø der ein bryr seg om veldig om kvarandre, noko som gjer at ein kjem lettare under overflata i samtalar. Eg trur årsaka til det er at vi har så mykje tid i lag både i skule- og fritid. Dessutan er Vestborg ein plass der det er veldig godt å ha blikket festa på Jesus. Her har vi andre å dele trua med, og her kan vi vekse i trua. Vi har bibelgrupper, møter, KRIK-samlingar og bønemøter. Elles har vi eit godt fagutval til å vere ein så liten skule, og dersom vi treng hjelp til skulearbeid, er vegen kort til naborommet. I tillegg har vi leksehjelp.

    – Etter ikring 1 ½ år som Vestborg-elev, så har Susann gjort seg nokre erfaringar.

    – Eg har lært mykje om meg sjølv. Mellom anna har eg funne meir ut om korleis eg fungerer saman med andre, korleis eg likar å jobbe med skulearbeidet og kva mine verdiar i livet er. Eg har også lært om korleis andre menneske fungerer. Dessutan har eg har vekse i trua.

    JOBBA MED VERDAS BESTE FOTBALLSPELARAR

    I skrivande stund nærmar det seg jul, men likevel skal vi gå tilbake i tid. Årsaka er at Susann sommaren 2016 hadde ein uvanleg sommarjobb.

    – Eg var «outdoor adventure instructor» på eit fotballakademi for jenter utanfor Boston, Massachusetts på nordaustkysten i USA. Der var eg i sju veker, og hovudoppgåva mi var å vere med på å legge til rette for utandørsaktivitetar når jentene ikkje var på fotballtrening.

    – Korleis opplevde du sommarjobben din?

    – I fritida reiste eg litt rundt, og eg var mellom anna i New York. Men sjølve jobben gjorde at eg fekk sett innsida av USA på ein annan måte enn eg ville gjort om eg var turist. Berre det å få jobbe med Mia Hamm og Kristine Lilly, blant tidenes aller beste kvinnelege fotballspelarar, var stas. Elles fekk eg prøve ut mange ting som eg elles ikkje plar å gjere. Det var rett og slett gøy å vere der, og i samspel med deltakarar og instruktørar fekk bruk for det eg hadde lært på Vestborg om meg sjølv og andre, fortel Susann.


     

Telefon: 70 26 39 00
E-post: info@vestborg.no