Nyheter

- Vi skal gå i klasse, vi!

Inger Valbø, onsdag 20. januar 2010 14:01

15. -17. januar var 26 ungdommar innom på Vestborg for å smake på livet her. Fleire av dei har allereie bestemt seg for å kome igjen til hausten.

Helene og Marlene var to av dei som likte seg godt på Kick-Off. (Foto: Jørgen Vik)

Vg1-elev Klara frå Godøya ønskjer velkomen ein ho kjenner frå Valderøya. (Foto: Jørgen Vik)

Laurdag morgon er det mykje meir folk til frukost enn det bruker å vere.

Friske og opplagde etter ei natt på eit klasserom.

Skal tru om desse jentene blir faste ved frukostbordet til hausten?

Rektor orienterer.

Etterpå tek Vestborgelevar med seg dei nye og viser dei rundt på skulen. Her er dei på veg for å sjekke romma på Roalden.

Her ser det då fint ut!

Om kvelden er det elevkveld. Jan Magnus har leiken "tommel opp, tommel ned".

Full konsentrasjon.

Skal tru kven som står igjen til slutt?

Her er vinnaren! (Foto: Jørgen Vik)

På laurdagskvelden får eg ein prat med fire av deltakarane på Kick Off-helga.

 Frå venstre: Marlene frå Fosnavåg, Helene frå Byrkjelo, Lise frå Sandane og Tina frå Fosnavåg stiller gjerne opp til intervju i jentegarderoba medan dei andre har turnering i gymsalen.

- Kvifor kom de hit i helga?

- Eg var på besøk hos ei veninne her i haust, og det verka kjekt, og eg hadde lyst å vite meir om skulen, fortel Helene. Denne gongen fekk ho med seg veninna Lise.

- Det verkar gøy å bu på internatskule, seier Lise og Tina.

- Eg får ikkje lov til å flytte på hybel, legg Lise til. – Og eg har høyrt at det er bra miljø her. Ein blir betre kjend med folk når ein bur i internat, trur ho.

Jentene snakkar i munnen på kvarandre, så det er litt vanskeleg å få med seg kven som seier kva. Det tyder iallfall på at dei har hatt det bra her.

- Kva inntrykk har de fått av skulen?

- Det er snille lærarar her, iallfall han rektoren er veldig snill, seier fleire av jentene.

- Det verkar som om alle er glade i kvarandre og at her ikkje er noko klikkmiljø. Det er positivt, legg dei til.

- Kva har de gjort her denne helga?

- Vi har sett film, spela biljard og hatt leikar i gymsalen, ramsar jentene opp. Men det kan sjå ut som om jentene har sett mest pris på tida til å prate ilag:

- Vi har blitt kjende med dei vi muligens skal gå i klasse med. Vi føler oss samanknytta allereie etter éin dag!

Dei nemner ein episode som viser dette: Ein gut kom litt seinare enn dei andre, og då var det ei som snakka om ”han nye i klassa”!

- Vi skal gå i klasse, vi! Vi har iallfall gått i klasse ei helg, avsluttar Tina. Ho og Marlene har allereie bestemt seg for å starte på Vestborg, og Helene og Lisa vurderer det sterkt. Alle fire anbefaler også andre å kome og sjå på skulen.

Det vart også tid til leik i snøen. (Foto: Lise S.)

Velkomne tilbake!

Sjå fleire bilete her: Bildegalleri